مي عبد التواب تكتب دور ع السعاده والامان
السبت, 31 ديسمبر 2022, 12:03 ص دور ع السعاده والامان
بقلم / مي عبد التواب
السعادة والخير دايرة كل ما بتلف بترجع لصاحبها من تاني،ابتديها من عندك ومهما طال الوقت هترجعلك تاني بأي شكل المهم تركز انت عشان تعرف تشوفها وتحس بيها،اوقات ربنا بيردهالنا بتفاصيل صغيرة فارقة جداً لينا بس احنا اللي مش بناخد بالنا منها عشان مركزين عنينا على حاجات تانية عايزنها ،
كل ما هتتعود تركز كل ما هتشوف الحلو اللي بيتردلك
جدد دايماً نيتك انك كل يوم تكون سبب انك تفرح او تساعد حد بأي حاجة ولو كلمة وهتلاقي السعادة والخير بيرجعولك تاني
أوقات كتير كل واحد فينا بيصحى من نومه ويبتدي يومه بيحس إنه لوحده فى طريقه اللى هيمشيه. مفيش معاه اللى يعرفه الطريق منين ويمشى لفين أو حتى الطريق ده هو الصح ولا لأ.
ويفضل مكمل يومه وهو تايه مابين يكمل طريقه ولا يقف ولا حتى يغيره ولفين يروح وبين مين اللى ينفع يكمل معاه اوحتى يساعده وياخد بإيده يغير الطريق ده للأحسن .
يوم ماتحس كده اطلب من ربنا رسايل تنورلك وعلامات ترشدك الطريق الصح ليك واتبعها وامشى وراها وعمرك ماهتوه ولا هتضل طريقك بعدها ابدا.
رسايل وعلامات ربنا نور هينورلك الضلمة والتوهة اللى ممكن تحس بيها كل فترة .
ارفع عنيك للسما وبس ف مهما كان الأمر هناك من يدبر الأمر
الآمان أهم من الحب ألف مرة
الهوا اللى بيتنفسه أى حب هو الآمان .الحب يمكن بيحلى الدنيا والروح والملامح .لكن الآمان هو اللى بيخلى الإحساس ده يدوم .بتشوف الحلو فى الدنيا وفى نفسك مهما حصلت غلاسات ومشاكل الحياة .هو اللى بيطمن إن مهما حصل من زعل أو خلافات فيه إيد ماسكة فيك مهما كان وعين تشوف منها الحلو اللى ممكن يغيب عنك أو وقت عينيك مش قادرة تشوفه.
دوروا على الآمان اللى تحسوه من اللى قدامكو قبل الحب ‘الآمان هوالعمود الفقري لاي علاقة ممكن تكمل من غيره هتلاقي نفسك كل يوم بتنطفي اكتر وكل مابيغيب بيسحب روحك من الحياة. الخذلان من إحساسك بالآمان مع حد بيوجع الف مرة من خذلانك فى حبه، كل القلوب ممكن تحب لكن مش كلها تقدر تدي احساس الآمان
أكيد إحساس الحب حلو لكن أمانك فى الحب ومع اللى بتحبه أحلى .
اختارو صح عشان تعيشو وتتنفسو بالحب مش تعيشو حالة الحب
إفهم الحكمة ودور ع النعمة
أما تتلغبط من حواليك اقف مكانك شوية إعمل هدنة من كل حاجة.مش غلط إنك تقف الغلط إنك تكمل وإنت مش شايف .متقاوحش إنك تستريح من الجرى فى كذا سكة عمال تجرى فيها من غير ماتبص إنت ماشى صح أو لأ.محتاج تقف وتراقب كل حاجة حصلت وبتحصل وتتأمل بس فى اللغبطة ديه. خد النعمة منها وفكر فى حكمة ربنا فيها .يمكن ربنا عايزك تهدى وتفكر عشان تمشى الطريق الصح اللى يوصلك لهدفك .
مش أى سكة تمشى فيها وخلاص.يمكن نسيت حاجات محتاج تشوفها تانى بطريقة أوضح من غير سرعة وإنت بتجرى بس عشان توصل لهدفك .
وسط أى لغبطة وزحمة تحصلك إهدى واقف وركز وراقب دور على نعمة ربنا وفكر فى حكمته من اللغبطة ديه .
جوة أى أزمة نعمة وحكمة منها خليك واعى واتعود تخطفها بدل ماتتخطف إنت وتتوه جوة الأزمة .
بشوف دايماً إن أى حاجة فى حياتنا مرتبطة بفكرة الآمان ،آمان فى علاقات سواء(أصحاب،أهل ،حب)، أشخاص بنتعامل معاهم ونرتاح ليهم فبنكمل معاهم ،أو نقرر البعد عنهم عشان فقدنا إحساس الآمان ده معاهم ،
آمان فى أماكن بنحبها ونحب نروحها وبنرتاح فيها أو نقرر منروحهاش تانى ولا نفكر حتى نعدى عليها ، آمان فى حياة عايشينها،وأى وضع بنعيشه نكمل فيه،أو ممكن نسيبه ونغيره ونبعد نهائى عنه،
هتلاقي دايما إن نقطة الآمان هى اللى ممكن تفصل فى أى حاجة تكمل أو لأ، لو القلب في وقت حس بالخوف ومعرفش يتطمن بأي شكل بيركز عينيك على كل حاجة،وتبتدي تحسب كل موقف قدامها ،
أول مابنبتدى نخاف بنتغير ،إحساس الخوف بيطرد أى إحساس غيره ويبتدى رحلة الحسابات اللى كالعادة بيتبعها صمت كتير وتفكير وبعدين تغيييير
بنتغير لدرجة إننا ممكن منعرفش نفسنا ،ممكن نبعد عن الحد أوالحاجة اللى معرفناش نتطمن معاها ،بنقرر البعد حتى لو روحنا فيه أو فيها،بنمشى ومفيش أى حاجة باقية ليها جوانا ،
الخوف مش عكس الآمان بس !
لكنه أساس أى تغيير ممكن يحصلنا لأى حاجة فى حياتنا سواء تجاه أشخاص أو حياة كاملة،
الآمان مش كلمة بتتقال وخلاص ده إحساس لو معرفتش تحسسه للى معاك متستغربش مشى ليه ومتسألش إتغير ليه دور الأول إنت حسسته بإيه؟
لو اللى معاك اتطمن ،هتكسب روحه و آمانه وهتحافظ على حياتك معاه
ربنا يرزقكم دايما الآمان وطمأنينة القلب
الحياة ابسط من اننا ندقق فى تفاصيل كتير ملهاش لازمة تتضيع الحلو اللى فيها .اليوم اللى بيعدى مش بيرجع .كل يوم فرصة جديدة عشان نتعلم ونعيش غير امبارح .مش نزعل على امبارح وندعى ربنا يبعتلنا اللى نتمناه لبكرة مش نقلق على بكرة.
رسايل ربنا مفيش أحن منها عليك ولا أحلى منها وهى بتجيلك بعد ما بتدعى ربنا بيقين انه هيبعتلك الخير
ادعو ربنا دايما بيقين وهتلاقو رسايل ربنا بتطمن وتطبطب على قلبك.