انا راجل شرقي بحبها ولكن حب بالعسل الاسود

بقلم: اميره همام

أنا راجل شرقي بحب بالعسل الاسود ..أنا راجل شرقى لكن فشلت فى إشراقها واضاءتها ..

انا راجل شرقي بديها فلوس بس بحقق على كل حاجة بتشتريها بكام و ليه لزمتها ، ولازم احسسها انها اضحك عليها ، و أخليها تكره اللحظة اللي أديتها فيها فلوس واخليها تكره انها تطلب مني تاني حاجه .
انا راجل شرقي بحبها
وبخرجها بس من قبل ما اخرج معاها بقولها اخلصى كل ده بتعملي ايه و أستعجل كل حاجة كأني مجبور علي الخروج معاها .

انا راجل شرقي وبحبها
وبروح معاها عند اهلها بس طول ما انا هناك كأن في حشرات بتقرصنى وبيبقى في ثقل على قلبى…
انا راجل شرقي وبحبها
بس بنقدها دايما واحسسها بالفشل بس اما تنجح فى حاجة لازم اتريق عليها و أقولها بهزر بعد مااكون كسرت جواها حب انها تشوفني فرحان بنجاحها .
انا راجل شرقي وبحبها
لكن بقوم بمقارنتها بكل تصرفات غيرها من الستات اللي ممكن يكونوا اقل منها أو حتي احسن منها بس اما تقولى غيرك بيعمل كذا بقولها معندكيش ذوق و كلامك كله قله ادب وفيه عدم احترام لزوجك وانتي كلامك يخرب البيت .
انا راجل شرقي بحبها
لكن بجرحها وبستفزها وبعصبها بس اول ماترد عليا بقولها انتى اهلك معرفوش يربوكي ..
انا راجل شرقي وبحبها
بقولها كل سنة وانتى طيبة بس فى نفس اليوم برجع من برة بنفخ زى كل يوم عادى وانام واعطيها ظهري واكنها مش موجوده .
انا راجل شرقي بحبها
بس بعاتبها انها مش بتدلعنى لكن انا بطلب منها الحاجة كأنها خدامة بامر وبدون مشاعر وبدون اهتمام وبدون حنيه وبدون دلع ومطلوب منها هي الدلع .
انا راجل شرقي وبحبها
لكن بتريق عليها ولو مضحكتش على تريقتى عليها تكون نكديه ..
انا راجل شرقي وبحبها
لكن في نفس الوقت بتحسر على الستات اللى مدلعة نفسها ومهتمه بنفسها واستات الفيديو كليب وستات التليفزيون واول ماتقولى عايزة وقت لنفسى اهتم بنفسي أو عاوزه فلوس عشان اعرف اهتم بنفسي أطلعلها غلطانه وأنها مش حاسه بظروف واطلع لها مائه حاجة هي مقصرة فيها..
انا راجل شرقي بحبها
ولكن بقارنها بأمى في شغل البيت ودائما احسسها بالنقص وان امي احسن منها ولامه تقول ليه دي امك عندها شغاله أو دي امك هي كمان عندها تقصير في كذا يقولي انتي بتكرهي امي واهلي ..
انا راجل شرقي بحبها
ولكن بعلمها الغضب من كتر الضغط عليها واطالبها بالهدوء في رده فعلها
انا راجل شرقي بحبها
ولكن برميلها الكلمة البايخة اللي تكسر نفسها واطالبها تختار وقت العتاب لامه تتكلم بكسر نفسها ومنتظر منها الابتسامه وانا داخل من الشغل واتهمها انها ببوذ يسد البيبان المفتوحه .
انا راجل شرقي بحبها
ولكن بحسسها انها عبء عليا وحمل ثقيل واعاتبها انها ليه مكشره وحالتها النفسيه وحشه .
انا راجل شرقي بحبها
متجوزها لكن محسسها انها عانس معايا قاعده وخلاص .
انا راجل شرقي بحبها
ولكن بترك عليها مسؤوليه البيت والأكل ومسؤوليه الاولاد تربيه ومذاكره ونوادي واتهمها انها عالطول مشغوله ولو قالت انا تعبانه اقول انا بشتغل اجيب فلوس وانا مالي .
انا راجل شرقي بحبها
ولكن بتركها تشتغل مثلي مثلها وتصرف علي البيت مثلي مثلها وفي الاخر اقول لها انا غلطان اني سايبك تشتغلي براحتك .
انا راجل شرقي بحبها
وبهدها واطلب منها تتحمل علشانى بغلط لكن معترفش بغلطي أمامها

بوصلها لنقطه الدمار النفسي ولمرحله حب الموت اكثر من الحياه وبجلدها لو طلبت الطلاق وبجعل الناس تنظر لها انها كفرت بوعدها اني هصلح من نفسي ولكن بستسهل وجودها وامتلاكها وان المجتمع دائما يهاجم المراه التي تطلب الطلاق وأنها خربت البيت دون النظر انها تم خراب قلبها وعقلها ومشاعرها

أنا راجل شرقى احب بطريقه العسل الاسود انا رجل شرقي احب ولكن فشلت فى إشراقها واضاءتها

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *